گەر خولیای فێربوونی زمانی ئینگلیزیت بوبێ، دەکرێ تۆش یەکێک بووبیت لەوانەی ڕێگەی مێسنجەری فەیس بووک و چاتی Andy English Bot تاقیکردبێتەوە کە ڕاستەوخۆ پرسیاردەکات و وەڵامت دەداتەوە.بەڵام ئایە پرسیوتە چۆن بەوخێراییە پرسیار دەکات و وەڵام دەنێرێتەوە.؟
chat Bot ئەو تایبەتمەندییەی مێسنجەری فەیس بووکە، کە لەڕێگەیەوە زۆر بە ئاسانی و لە چاتەوە،دەتوانی سوود لەچەندین خزمەتگوزاری بەسوود وەربگری.لەوانە ئاگاداربوون لە ڕەوشی کەش و هەواو هەواڵە گرینگەکان،کەلوپەل و خواردەمەنی بکڕی،فلتەر بدەی لەوێنەکانت،تەکسی بگری، ئاگاداری کاتی بانگ ببی … هتد.

لەم بابەتەدا، ئاشنای chat Bot دەبیت و تێدەگەیت چۆن کاردەکەن و چۆن لەناو مێسنجەری فەیس بووک دا کەڵکیان لێوەردەگری.


facebook_F8

ساڵی ڕابردوو فەیس بووک لە کۆنگرەی خۆیدا کە بە F8 ناودەبرێت ،خزمەتگوزاری Botsی خستەناو  ئەپی مێسنجەر، ئەوەش لەلایەک بۆ کێ بەرکێ کردن لەگەڵ کۆمپانیا ڕکابەرەکانی, وە لەلایەکی دیکەشەوە یارمەتیدان و ئاسانکردنی پێداویستی ڕۆژانەی بەکارهێنەرانی ئەپەکەی، کە لە ئیستادا زیاد لە بلیۆنێک بەکارهێنەری هەیە.

 chat Bot چی یە:-

بریتیە لە خزمەتگوزارییەک یان ئامڕازێک یان پڕۆگرامێک،کە لەڕێگەی نوسین یاخوود دەنگ ڕاستەوخۆ گفتووگۆ لەگەڵ بەکارهێنەران دەکات و وەڵامی پرسیار و داواکارییەکان دەداتەوە.

شیوازی کارکردنی Botەکان دوو جۆرە؛ جۆرێکیان وەڵامدانەوە و هەڵسان بە ئەنجامدانی ئەرکەکانی دیاری کراوە،واتا ناتوانێت لەو سنورە دەربچێت کە گەشەپێدەر بنچینەی ئیشکردنەکە و پرسیارەکانی لەسەر بنیادناوە، وە تەنها دەتوانێت وەڵامی شتگەلێکی دیاری کراو بداتەوە کە پێشتر و لەکاتی دروستکردنیدا،ئامادەکراوە و فێری بووە.
بەنمونە: ئەو Botەی کە بۆ زانینی بارودۆخی کەش و هەوایە، ناتوانێ هەڵستێ بە ئەنجام دانی فرمانێکی تری جیاواز،گەر لە چوارچێوەی ئەو فرمانانەدا نەبێت کە گەشەپێدەر ،وەڵام و ئەنجامدانی بۆ دیاری کردووە.

جۆرێکی دیکە هەن، کە تەواو پشت بە پلان و فرمانی پێشوەختی گەشەپێدەرانیان نابەست لە کاتی وەڵامدانەوەی پرسیار و بە ئەنجام گەیاندنی فرمانەکانی بەکارهێنەران. بەڵکوو، لەهەمان کاتدا سوود لە سەرچاوەی دیکە وەردەگرن وە هەروەها لە کۆی هەموو ئەو گفتووگۆیانەی کەلەگەڵ بەکارهێنەران دەیکەن،بە تێپەڕبوونی کات شت فێردەبن،وە بەشێوەیەکی باشتر و وردتر فرمانەکانی بەکارهێنەران جێ بەجێ دەکەن.بەنموونە، گەر بێت و بپرسی ” چ باسە لە ئەمریکا.؟ ”  ئەوا لەوانەیە ڕاستەوخۆ نوێترین مانشێتی هەواڵی ئەمڕۆ لە BBC سەبارەت بە ئەمریکا وەربگرێت و بیخاتە پێش چاوت.

دووەم جۆریان، بە Bot ی زیرەک ناودەبرێن، چونکە لە دروست کردنیان دا، چەندین ئەلگۆریزم بەکار هاتووە، تاکوو بتوانن بە شێوازێکی دروست،گفتوگۆ لەگەڵ مرۆڤدا بکەن.

شایەنی باسە،Siri کۆمپانیای ئەپڵ و Cortana ی مایکرۆسۆفت و Google now ی گوگڵ و چەندانی دیکە، بریتین لە Bot .
google-siri-cortana

 بەکارهێنانی Botەکانی ناو مێسنجەر:-

لەناو مێسنجەردا، چەندەها Bot ی جۆراوجۆر هەیە، کە هەر یەکەیان بۆ ئیش و فرمانێکی دیاری کراو بەکاردەهێنرێت، لەوانە:

زانینی بارودۆخی کەش و هەوای ناوچەکەت، وەرگرتنی هەواڵ و زانیاری،فێربوونی زمان، ڕاکێشان و پرێنت کردنی بەڵگە و وێنە و نوسراو، فلتەردان لە وێنە،داواکردنی تەکسی،کڕینی شتومەک و کاڵا، داواکردنی خواردن ، زۆر شتی دیکەش.

بە نمونە گەر بتەوێ ئاگاداری کەش و هەوا بیت،ئەوا دەتوانی لە ڕێگەی بۆتی(Yahoo Weather)، بارودۆخی کەش و هەوا بزانی ئەم هەنگاوانە بکە:
١-ىڕۆ بۆ ناو بەرنامەی مێسنجەری فەیس بوکەکەت و لە بەشی گەڕان، بنوسە  Yahoo Weather.
٢-دوای نوسینەکە، بۆتی تایبەت بە یاهوو لەسەرەتا دەردەکەوێ، ئەو هەڵبژێرە.
٣-ئینجا،سەرەتا GPSی مۆبایلەکەت بە ئیش بخە،وە دواتربگەڕێوە مێسنجەر و get started لێ بدە و شوێن ڕێنماییەکان بکەوە.

هەر بەو شێوەیەی لە نمونەکەی سەرەوە ئاماژەی پێدرا، دەتوانن ناوی هەر بۆتێکی دیکە بنوسن و بیدۆزنەوە.

لێرەدا -> Bot <- لیستی ناوی زۆرێک لەو چات بۆتانە ببینە کە لە مێسنجەردا هەن.
botsبوونی Bot گرینگییەکی زۆری هەیە، کۆمپانیا و دامەزراوەکان،دەتوانن بۆ ئیش و کارەکانیان دروستی بکەن و بەجۆرێک دەتوانێت بەردەوام ( ٧ ڕؤژی هەفتە و ٢٤ کاتژمێر ) وەڵامی پرسیارەکان بداتەوە و ئەو کات و بارگرانییە بگەڕێنێتەوە کە لەسەر کارمەندەکان دروست دەبێت. فرۆشیارەکان دەتوانن، بەشێوەی سەرهێڵ و لەڕێگەی Bot ەوە کاڵاکانیان نمایش بکەن،کڕیاریش هەر لەماڵی خۆیەوە و بەبێ چوون بۆ شوێنی مەبەست کاڵاکە سەیربکات و زانیاری و نرخ وەربگرێت هەتا دەتوانێت بیکڕێت.

هەموو ماڵپەر و دەزگایەكی ڕاگەیاندن ئازادە لە بڵاو كردنەوەی بابەتەكانی ماڵپەری تێك ئای، بەمەرجێك ئاماژەی بە سەرچاوەكە بكات

شەیر بكە بۆ هاوڕێیانت

دەربارەی نوسەر

دەرچووی پەیمانگای زانستی کۆمپیوتەرم،بەشێوەیەکی گشتگیر تێکەڵم لەگەڵ تەکنەلۆژیا،بەتایبەت لەگەڵ سیستمی وه‌گه‌ڕخه‌رى ویندۆز و ئەندرۆید. گەیاندنی بابەتە پێویست و گرینگەکان، وە هۆشیارکردنەوە و چۆنیەتی مامەڵەکردن لەگەڵ جیهانی تەکنەلۆژیا بەشێوەیەکی پارێزراو، ئامانجی منە.

Comments are closed.