#QR code چی یە؟
بریتیە لەجۆرێکی Barcode ی دوو ئەندازەیی ، بەکاردێ بۆ خێرا و ئاسان دەست گەیشتن بە زانیارییەکان لەڕێگەی ئامێرەکان بەتایبەت ئامێرە زیرەکەکان Smartphone.
ئەم جۆرە کۆدە،کورتکراوەی Quick Response ە ،بەکوردیەکەی دەبێتە ” کۆدی خێرا وەڵامدەرەوە” لە ساڵی ١٩٥٢ خراوەتە ناو داهێناننامەکان، ” Norman Joseph Woodland ” بە خاوەنی بیرۆکە و داهێنانی ئەم تەکنەلۆژیایە دادەنرێت.
QR گەشەپێدەری Barcodeە بەڵام:
- QR هەردوو هێڵی ئاسۆی و ستونی بەکاردێنێ لەکاتی نوسینی زانیاریەکانیدا واتا بەهەردوو ئاڕاستەکەدا زانیاری هەڵدەگرێ کە دەگاتە 7000 ژمارە یان 4000-9000پیت، بەڵام بار کۆد تەنها هێڵی ستونی بەکاردێنێ لەخوێندنەوەی زانیاریەکاندا واتا تاک ئاڕاستەیە، لەتوانایدایە 20 پیت هەڵگرێ.
- دیزاینی QR گۆڕاوە و جێگیر نی یە ، بەڵام بار کۆد شێوەیەکی نەگۆڕی هەیە.
- دەکرێ لەناو هەر QR ێک وێنەی جیاواز دابنرێ،کە ئەوەش چانسی تاک بوون و بێ هاوتابوونی هەر کۆدێک زیاد دەکات، وادەکات شێوەی ئەندازەیی کۆدێک لە یەکێکی دیکە جیاواز بێ.
- خوێندنەوەی کۆدیQR پێویستی بەچوون بۆ GS1 US نیە تا بزانی چی تێدا هەڵگیراوە بەڵکوو ڕاستەوخۆ لەلایەن بەرنامەی سکانی تایبەتەوە دەتوانرێ ڕاستەوخۆ لێکدانەوەی زانیارییەکە ببینرێ.
- گەر هاتوو بەهەر هۆیەک کۆدی QR بەشێکی نەما ، ئەوا هێشتا زانیارییەکانی ناوی دەکرێ بخوێندرێتەوە.
- بەهەر ئاڕاستەیەک دا دەکرێ کۆدەکانی QR سکان بکرێن بەڵام ئەوانەی بار کۆد تەنها بە باری ستونی دەتوانرێ.
#لە چ بوارێکدا بەکاردەهێنرێت؟
لە هەموو بوارێکی ژیاندا بە مەبەستی جۆراوجۆر بەکاردێ لەوانە:
- پێدانی زانیاری لەسەر شتێک یان نیشاندانی دەقێکی نوسراو.
- ناردنی پەیام یان کورتە نامە.
- پەیوەندی کردن بە ژمارەیەک.
- ناردنی ئیمەیڵ.
- دۆزینەوە و داونلۆدکردنی هەر جۆرە فایل و بەرنامەیەک لە ئینتەرنێتەوە.
- کردنەوەی وێب سایتێک.
- بۆ چات کردن لەگەڵ یەکێک.(وەک مێسنجەرکۆدی تایبەت بە فەیس بووک).
- پەیوەست بوون بە وایفای.
- پڕکردنەوەی فۆڕمی دامەزراندن ، زانیاری ، هتد.
- سەیرکردنی ڤیدیۆ (لەم دواییانەدا Rudaw بەکاری هێنا بۆ سەیرکردنی فیلمی سینەمای Angry birds).
- کڕینی شتومەک.
- ڕێکلام کردن بۆ بەرهەمەکان,
هتد. . . .
دەتوانی لای خۆت،ئەم وێنەیەی خوارەوە هەڵبگری ، هەرکات ویستت سکانێکی بکە،تا ئاگاداری دواین بڵاوکراوەکانی چاوی تەکنەلۆژیا بی:
#چۆن سکانی ئەو کۆدانە بکەی لە ڕێگەی مۆبایلەکەتەوە؟
بەرنامەی زۆر هەن بۆ سکان کردنی ئەم کۆدانە، بەڵام هەموویان سەلامەت نین چونکە زۆربەیان بەکارهێنەر هەڵدەخەڵەتێنن و ئەو زانیارییە نادەن بە بەکارهێنەر کەلەناو کۆدەکەدا هەڵگیراوە، بەڵکو لەوانەیە ئاڕاستەی وێب سایتێکی دیکە یان ئیمەیڵ بۆ کەسێکی دیکە بنێرێت یان بەرنامە و ڤایرۆس داونلۆد بکات یان زانیاری لەبەکارهێنەر بدزن بێ ئەوەی بەکارهێنەر پێی بزانێ . هەر بۆیە دەبێ ئاگاداربی هەموو بەرنامەیەکی سکان بەکارنەهێنی ، لەهەمان کاتیشدا سکانی هەموو کۆدێک نەکەی تا دڵنیا نەبی لە سەلامەتی سەرچاوەکەی.
ئێستا چاوێک بخشێنە بەناو مۆبایلەکەتدا و سەرنج بدە و بزانە بەرنامەت هەیە بەناوی QR Scanner؟ گەر هەتبوو بەرنامەکە بکەوە بەپێی ئەو سیستمەی لەسەر مۆبایلەکەتە، سکانی یەکێ لە وێنەی کۆدەکانی خوارەوە بکە تاکوو پڕۆگرامی پێشنیازکراو و سەلامەت لەلایەن ئێمەوە بۆ سکان کردنی کۆدەکانی QR داونلۆد بکەی:
ئەندرۆید ئای ئۆ ئێس ویندۆس فۆن
گەرهاتوو بەرنامەی سکان کردنی QR ت نەبوو، ئەوا لە خوارەوە داونلۆدی بکە:
گرتە لە وشەی Android بکە ، بۆ سیستمی ئەندرۆید.
گرتە لە IOS بکە بۆ سیستمی ئای ئۆ ئێس.
وە گرتە لە Windows Phone بکە بۆ ویندۆوس فۆن.
#چۆن کۆدێکی QR دروست دەکەی؟
دەتوانی بە دانانی هەر لینکێک ، نوسینێک لە دوای ئەم بەستەرەی ژێرەوە، ببی بە خاوەنی QR کۆدێکی تایبەت بە خۆت:
=http://chart.apis.google.com/chart?cht=qr&chs=300×300&chl
نم: من دەمەوێ لینکی ماڵپەڕی techeyeدابنێم،بەوجۆرە دێم لینکەکەی www.techeye.org دێنم لە کۆتای = دای دەنێم:
http://chart.apis.google.com/chart?cht=qr&chs=300×300&chl=www.techeye.org
دوای ئەوەی لینکەکەت دانا،ئینجا هەموو بەستەرەکە کۆپی بکە و لە تابێکی نوێدا داینێ و ئینتەر بکە.
بەو شێوەیە دەبینی ڕاستەوخۆ وێنەیەکی کۆدەکەت بۆ نەخشە دەکێشێ و نیشانی دەدات ، بۆ دڵنیایی دەتوانی بە پڕۆگرامی سکان کردنەکە سکانێکی وێنەکە بکەی و بچیتە ناو ماڵپەڕەکەوە.
ئەمەی سەرەوە ڕەنگە زۆر یارمەتیدەر نەبێ بۆ ئەو هەموو ئیشەی باسمانکرد کە بە QR دەکرێ ، دەتوانی ئەو لینکانەی خوارەوە بەکار بهێنی بۆ دروست کردنی کۆدێک بۆ ئەو مەبەستەی دەتەوێ:
http://goqr.me
http://www.qr-code-generator.com
http://qrcode.tec-it.com/en
http://www.qrstuff.com
https://qrcode.kaywa.com
http://www.visualead.com
#چۆن سود لەو کۆدانە وەردەگری؟
دوای دەست خستنی یەکێ لەو کۆدانە ،سودێکی نابێ گەر تەنها لای خۆت بمێنێتەوە و خەڵکی دیکە سکانی نەکەن. کەواتە چۆن دەکرێ سودی لێ وەربگری:
بیخە سەر کارتی بازرگانی و بەهۆیەوە مەودای فراونکردنی ناساندنی ئیشەکەت فراوانتر بکە، ئەویش بە دانانی لینکی وێب سایتەکەت ، پەیجی فەیس بووکەکەت.هەرشتێکی دیکە لەناو کۆدی QR .
دەتوانی کۆدەکەت لەو کەلوپەلانە بدەی کە دەیانفرۆشی وشوێنەکەت بە فرۆشیار بناسێنی و پەلکێشی شوێنەکەوتیان بکەی.
دەتوانی فایل و بەرنامەکانت بکەیت بە کۆد ، تا دواتر لە ڕێگەی تەنها سکانێکەوە کەسی بەرامبەر داونلۆدی بکات.
لەهەر بوارێکدا و بۆ هەر بیرۆکەیەک دەتوانرێ سود وەربگیردێت لە کۆدی QR .
