دانیشتوویەکی شاری سلێمانی ئۆتۆمۆبێلێکی تایبەتی لە کۆمپانیای بی ئێم دەبلیو درووستکردووە و ئەوەش کاری دەستە و تایبەت بۆ عێراق درووستکراوە.
ئەو بی ئێم دەبلیوە جۆری (BMW ٧ Series)ە و بۆ درووستکردنی زیاتر لە دوو مانگی ویستووە و ئەوەش لەبەر ئەوە بووە کە تایبەتە، ئەگەر نا کۆمپانیای بی ئێم دەبلیو لە ٩ خوولەکدا ئۆتۆمۆبێلێک بەرھەم دەھێنێت.
خاوەنی ئۆتۆمۆبێلەکە شوان بەغڵەمەیە کە دانیشتوویەکی شاری سلێمانییە و تایبەتمەندییەکانی ئەو ئۆتۆمۆبێلەش بریتین لەمانە:
-دەتوانێت بەبێ شۆفێر بڕوات و نەخشەی کوردستانی تێدایە و ئەوەش بۆ یەکەم جارە ئەو نەخشەیە بناسێنرێت بە ئۆتۆمۆبێلێکی بی ئێم دەبلیو.
-٩ کامێرای ئێچ دی لە چواردەوردا تێدایە کە دەوری رادار دەبینن و توانای ھەیە ھەموو تابلۆکانی ھاتووچۆ بە زمانی عەرەبی و ئینگلیزی بناسێتەوە و راداری شەوی تێدایە.
-شاشەیەکی روون لەسەر جامی پێشەوەی ھەیە کە تەنەکانی چواردەور پیشان دەدات پێت دەڵێت بە چ ئاڕاستەیەک دێن و خێراییان چەندە و ئەو سیستەمە ناوی (Object Detecting System)ە.
-مەکینەیەکی ٨ پستۆنی ھەیە کە ٤.٤ لیتر وەردەگرێت بۆ سەرف کردن و توانای ٤٨٠ ئەسپی ھەیە و تۆرکی گێڕەکەشی ٤٨٠ نیوتن مەترە و لەماوەی ٤.٢ چرکەدا خێراییەکەی دەگاتە (١٠٠) کیلۆمەتر لە کاتژمێرێکدا.
-سیستەمی کارەبای تێدایە و دەتوانیت بە پاترییەکی تایبەت ئۆتۆمۆبێلەکە لێبخووڕیت و خێراییەکەی دەگاتە (١٢٠) کیلۆمەتر لە کاتژمێرێکدا و زیاتر لەو خێراییە دەچێتەوە سەر بەنزین.
-جی پی ئێسی تایبەتی تێدایە کە سەرفکردنی بەنزین رێکدەخات و لەناو شار کەمتر بەنزین سەرف دەکات بەراورد بەڕێی دەرەوە و خێرایی سەر شەقامەکان دەزانێت و رێگە نادات لەخێرایی رێگەپێدراو زیاتر بڕۆیت.
-کوشنەکانی سیستەمی جیوەی تێدایە بۆئەوەی راست ببێتەوە و ئازار بە پشت نەگەیەنێت و مەساج دەکات و جۆری چەرمەکەی تایبەتە و گرەنتی ٥٠ ساڵی لەگەڵە کە تێکنەچێت و ٢٨ ئێرباگ لەناو ئۆتۆمۆبێلەکەدان.
-جامەکانی فۆتۆن و لەکاتێکدا تیشکی خۆری بەردەکەوێت رەش دەبێت و ئازاری چاو نادات.
-١٥ ھەزار گڵۆپ لە بنمیچی ئۆتۆمۆبێلەکەدا جێگیرکراوە کە ناھێڵێت سەرنشین بێزار ببێت و رەنگیشی دەگۆڕدرێت.
-دوگمەکانی کڕۆم و شووشەن و گڵۆپەکانی لەیزەرن و ئەوەش تازەیە لە جیھانی ئۆتۆمۆبێلدا.
-دەبڵ ئەکسلە و درێژییەکەی دەگاتە ٥.٣٣ مەترە و تەکنەلۆژیای کاربۆنی تێدا بەکارھێنراوە و نزیکەی ١٧٠ کیلۆ لە کێشی کەمبۆتەوە و لە رووداودا کەمترین زیانی بەردەکەوێت.
-دەتوانیت بەبێ دەستلێدان و تەنھا لەڕێگەی ھێماکردنەوە فرمان بە ریکۆردەر و ئامڕازەکانی تری بکەیت.
-لەڕێگەی سویچەوە دەتوانیت ئۆتۆمۆبێلەکە بەبێ شۆفێر بجووڵێنیت و بیھێنیتە لای خۆت یان پارکی پێبکەیت.
-تا ٧٠ پلەی سەدی کێشەی بەرزبوونەوەی پلەی گەرمی مەکینەی نییە و بەرگەی گەرمی دەگرێت.
-کامێراکانی تاسە دەناسێتەوە و ھەرکات تاسە بەرز بێت دەبڵەکانی بەرزدەبنەوە و سەرنشین بێزار نابێت و ئەو سیستەمەش ناوی (Active Body Control)ە.
ئۆتۆمۆبێلەکە تابلێتی ھەیە لە پشتی کوشنەکانییەوە و گرەنتی سێ ساڵی لەگەڵدایە و تێچووی درووستکردنەکەی (١٧٥) ھەزار دۆلاری ئەمەریکی بووە.
s:kurdistan new cars
